“Ўзметмашсаноат” тармоқлари ходимлари касаба уюшмаси Самарқанд–Жиззах вилоят бўлинма кенгаши тасарруфидаги “SAMPLASTSERVIS” МЧЖ, “Samarkand Polimer” МЧЖ ҳамда “SPS Rubber” МЧЖ корхоналарида 2023–2025 йилларга мўлжалланган жамоа шартномасининг 2025 йилда бажарилишига бағишланган йиғилиш бўлиб ўтди.
Йиғилишда корхоналар иш берувчилари, бошланғич касаба уюшмаси ташкилотлари раислари, вилоят бўлинма кенгаши мутахассиси С. Иззатуллаев ҳамда ишчи-ходимлар иштирок этдилар.
Тадбир аввалида корхоналарда меҳнат қилаётган хотин-қизлар 8 март — Халқаро хотин-қизлар куни муносабати билан самимий табрикланди. Фаол ва ташаббускор хотин-қизларнинг бир гуруҳига тармоқ касаба уюшмаси Республика кенгаши ҳамда вилоят бўлинма кенгашининг эсдалик совғалари топширилди.
Шундан сўнг меҳнат жамоасининг 2023–2025 йилларга мўлжалланган жамоа шартномасининг 2025 йил якунлари бўйича иш берувчи ҳамда касаба уюшма қўмитасининг ҳисоботлари тингланди. Шунингдек, текширув комиссиясининг далолатномаси ўқиб эшиттирилди. Қизғин муҳокамалардан сўнг жамоа шартномасининг 2025 йилда бажарилиши қониқарли деб баҳоланди.
Йиғилиш давомида иштирокчилар меҳнат жамоасининг 2026–2028 йилларга мўлжалланган жамоа шартномаси лойиҳаси билан ҳам таништирилди. Муҳокамалар жараёнида билдирилган таклиф ва мулоҳазалар асосида айрим ўзгартиришлар киритилиб, жамоа шартномаси бир овоздан қабул қилинди.
Мазкур йиғилиш меҳнат жамоасида ижтимоий ҳамкорликни мустаҳкамлаш, ишчи-ходимларнинг меҳнат ва ижтимоий ҳуқуқларини ҳимоя қилишда жамоа шартномаларининг аҳамияти янада юқори эканини намоён этди.