2025 йил 29 декабрь куни Республика Кенгашида Ўзбекистон Республикаси мотоциклчи байкер-курьерлари вакиллари билан учрашув бўлиб ўтди. Учрашув давомида мазкур соҳада фаолият юритаётган ходимлар учун касаба уюшмасини ташкил этиш масалалари юзасидан атрофлича музокаралар олиб борилди.
Музокара жараёнида байкер-курьерлар вакилларига касаба уюшмаларининг бугунги кундаги фаолияти, асосий мақсад ва вазифалари, меҳнат қилувчи ходимларнинг ҳуқуқ ва манфаатларини ҳимоя қилишдаги ўрни, шунингдек, ижтимоий шериклик тизими ҳақида батафсил тушунтириш берилди.
Учрашув якунида ҳозирча Тошкент шаҳар ва вилоят касаба уюшмалари билан ўзаро ҳамкорлик қилиш, битим тайёрлаш бўйича келишиб олинди. Байкер-курьерлар вакили Шовкат Ашимбаев ўтказилган суҳбат ва билдирилган таклифлар учун миннатдорчилик изҳор этди.
Таъкидланганидек, ушбу лойиҳа тўлиқ амалга оширилган тақдирда, келгусида 10 минг нафаргача байкер-курьерларни касаба уюшмалари сафига жалб этиш имконияти мавжуд бўлиб, бу касаба уюшмалари ҳаракатини янада кенгайтиришга хизмат қилади.