«Автоойна» МЧЖда Ўзбекистон Республикаси Мустақиллигининг 35 йиллиги муносабати билан «Ягона Ватан, ягона халқ бўлиб, янги ҳаёт ва келажак яратамиз!» шиори остида байрам тадбири ташкил этилди.
Тадбир давомида корхонада кўп йиллардан буён самарали меҳнат қилиб келаётган ва юбилей ёшига етган 7 нафар ходим, шунингдек, Мустақиллик байрами муносабати билан ўтказилган спорт спартакиадасида ғолибликни қўлга киритган 27 нафар иштирокчи ҳамда ўзининг фидокорона меҳнати билан жамоа ривожига муносиб ҳисса қўшиб келаётган 35 нафар фаол ходим фахрий ёрлиқ ва эсдалик совғалари билан тақдирланди.
Тадбирда Ўзбекистон Республикаси Президентининг «Ўзбекистон Республикаси Мустақиллигининг 35 йиллиги муносабати билан давлат хизматчилари ҳамда ишлаб чиқариш ва ижтимоий-иқтисодий соҳалар ходимларидан бир гуруҳини мукофотлаш тўғрисида»ги Фармонига асосан «Шуҳрат» медали билан тақдирланган Ишлаб чиқариш ускуналарига техник хизмат кўрсатиш бўлими чилангар-таъмирловчиси Алишер Ахмадалиевич Акбаралиев ҳам жамоа олдида муносиб эътироф этилди.
Тадбир якунида барча иштирокчилар учун байрамона дастурхон ташкил этилиб, ходимлар бир дастурхон атрофида жам бўлдилар ҳамда Мустақиллик байрами шукуҳини биргаликда нишонладилар.
Байрам тадбири кўтаринки руҳда ўтиб, ходимларга юртимиз мустақиллиги, тинчлик ва осойишталикнинг қадрини яна бир бор ҳис этиш, эзгу мақсадлар сари ҳамжиҳатлик билан интилиш учун кўтаринки кайфият бағишлади.